 | |
| البلايستيشن من الحاجات المهمة في حياة معظم الشباب |
حاجات كتير بتخلي الراجل ومراته يتخانقوا سوا، ممكن علشان مشاكل مادية، أو خلافات في وجهات النظر، وممكن علشان بلايستيشن، أيوه بلايستيشن ده بيعمل مشاكل كتير بين الرجالة والستات في البيوت، سواء كان بلايستيشن في بيتك أو بتروح تقابل أصحابك وتلعبوا.
لكن إحنا بقى هنقولك إزاي تخلي مراتك تحب بلايستيشن، إزاي تحل المشكلة دي، أو بمعنى أدق الصداع ده.
أولًا: بلايستيشن هيخليك متطلبش حاجات كتير من مراتك:
حبيبتي أما بقعد ألعب بلايستيشن مش هفضل أخنقك بطلباتي، شاي على قهوة على عصير على حاجة حلوة، يعني هريحك ومش هتعبك في حاجة.
خدي بقى النقطة الأهم، إني لو نزلت العب بلايستيشن مع أصحابي في الشارع، ده طبعًا في الظروف العادية بعد ما تخلص أزمة كورونا إن شاء الله، هجيبلك طلباتك كمان وأنا جاي، وخليك ذوق وهات لها شيكولاتة ولا حاجة حلوة كده وتقدمها رشوة تقفل بيها أبواب النكد.
ثانيًا: كلم مراتك عن فوائد بلايستيشن:
على فكرة بلايستيشن ليه فوائد كتيرة أنتي مش عارفاها، طبعًا هي هترفع حاجبها اليمين أو الشمال حسب ظروفك، وتحط إيدها في وسطها وتقولك يا سلام ؟!!
قولها طبعًا، منها مثلًا إن بلايستيشن من الضغوط، وبعدين إنتي متعرفيش إنه بيأخر أعراض الشيخوخة كمان، يعني هفضل شباب على طول في نظرك.
ثالثًا: اقنع مراتك تلعب معاك بلايستيشن:
جربت تكلمها تلعب معاك بلايستيشن ؟، لو بتحب الكورة يبقى حظك ياعم، بس على الله متعملش فيك زي مي عز الدين وتامر حسني في فيلم عمر وسلمى 2 !!!.
أما بقى لو ملهاش في الكورة زي أغلب الستات، ممكن تشوفلها لعبة تكون بتحبها وتجيبها وتخليها تلعب هي كمان، صحيح أنت ساعتها مش هتقدر تقعد تلعب بلايستيشن براحتك، بس أما تتحرم منه شوية أحسن ما يتنكد عليك بالساعات!.
بعد الحاجات دي لو مراتك مقتنعتش ومحبتش بلايستيشن، بيعه يا ابن الحلال وأنت الكسبان !!
أسعار بلايستيشن:
طبعًا معروف إن بلايستيشن في منه إصدارات كتير، من أول بلايستيشن 1 لحد 4، أسعار بلاي ستيشن 4 لو هتجيبه جديد هيبقى متوسط تمنه من 5 لـ7 آلاف جنيه، أما المستعمل فيعمل حوالي 4500 جنيه، ممكن يزيد لو معاه لعب كتير أو دراعين أوريجينال مثلًا، في منه 3 إصدارات الفات والسليم والبرو، مفيش بينهم فروقات جوهرية فلو لقيت جهازين من إصدارين مختلفين وواحد أرخص من التاني هات الأرخص وأنت أولى بالفلوس.
أسعار بلايستيشن 3 لو عرفت تجيبه جديد ممكن يوصل 3 آلاف أو 3200، والمستعمل منه هيعمله حوالي 2500 أو 2000 كمان، الميزة في بلايستيشن 3 إن في منه نسخ "هارد" يعني بيبقى جواه هارد تملاه لعب زي مانت عاوز.
أما بلايستيشن 2 دلوقتي سعره ممكن يبقى 1000 جنيه جديد ده لو لاقيته، والمستعمل ميعديش 800 جنيه، وبلايستيشن 1 جديد بحوالي 300 أو 400 جنيه بس ده خلاص مبقاش حد يفكر فيه.
أسعار بلايستيشن 5:
المفروض إن السعر الرسمي بتاعه 450 دولار حسب الكلام المتداول حاليًا، بما يوازي 7200 جنيه مصري، لكن ده السعر الرسمي، لما ينزل بقى المحلات ممكن يوصل 10 أو 11 ألف جنيه، طبعًا لو اشتريته بالسعر ده مراتك هتطلب الطلاق مش هتتخانق معاك .. دي مش بعيد تخلعك كمان!!.
شركة سوني أعلنت من كام يوم عن شكل دراع بلايستيشن 5، واللي فيه مميزات عن دراع بلايستيشن 4، لكن أهم حاجتين، إن الشاحن بتاعه هيبقى Type - C وده هيخلي الدراع يشحن أسرع، والحاجة التانية إن الدراع مش هيجيلك معاه سماعة زي بلايستيشن 4 تتكلم بيها مع الناس اللي هتلاعبهم أونلاين، لا دراع بلايستيشن 5 هيجيلك جواه ميكروفون تلقائي.
تعليقات
إرسال تعليق