 |
| ياسمين صبري مع أبو هشيمة |
ياسمين صبري وهيفاء وهبي .. فيكوا شنب من بعض!
الحمدلله الفنانة ياسمين صبري اتجوزت من رجل الأعمال الكبير أحمد أبو هشيمة بعد قصة حب وصور وكلام وقيل وقال وتدريبات في نفس الجيم وصور وتلميحات .. ما علينا، المهم إنه إمبارح ياسمين صبري وأبو هشيمة أعلنوا جوازهم في حفلة كده على الضيق عقبال عندكم محضرهاش غير بعض أفراد العائلة، إياك بقى اخواتنا بتوع الأفراح واللمة والرقص والزيطة يهمدوا شوية .. ياسمين صبري وأبو هشيمة بيتجوزوا سُكّيتي أهو عادي يعني، صحيح الموضوع علشان فيروس كورونا بس اهو اسمهم معملوش فرح برضو ولما الليلة على الضيق كده.
الفنانة ياسمين صبري نشرت على حسابها في انستجرام صورتها مع أبو هشيمة وكتبت تاريخ امبارح 17/4/2020، وطبعًا فنانين كتير دخلوا باركولها زي فيفي عبده وهنا الزاهد وسيرين عبد النور ووفاء عامر وحلا شيحة وأيتن عامر وغيرهم من النجمات.
ياسمين صبري وهيفاء وهبي تحت سيطرة أبو هشيمة:
الواضح كده من صور ياسمين صبري مع أبو هشيمة أو حتى وهي لوحدها، إن الراجل ده مسيطر، سواء معاها أو مع هيفاء وهبي من قبلها .. الصورة مبتكذبش!.لما تقلّب في صور ياسمين صبري وهيفاء وهبي، هتلاقي إن الاتنين تقريبًا ظهروا بنفس الفستان التايجر، كل واحدة اتصورت بيه مع أبو هشيمة، والغريبة في المرتين الراجل كان لابس بدلة سودة برضو .. بص كده انت وهي
 |
| ياسمين صبري وهيفاء وهبي وهما مع أبو هشيمة |
خد التقيلة بقى .. ياسمين صبري وهي متصورة مع أبو هشيمة، كانت لابسة نفس الإسورة اللي لبستها هيفاء وهبي لما كانت مرتبطة بأبو هشيمة، يعني مش أنت لوحدك اللي بتعرف ترجع الشبكة بتاعتك يا شبح، ولا أنتي لوحدك اللي بتسيبي شبكتك بعد ما تسيبي حبيب القلب، لا حضرتك أحسن من ياسمين صبري ولا جنابك أحسن من أبو هشيمة.
 |
| هيفاء وهبي وياسمين صبري |
هو الحقيقة الموضوع موقفش عن النقطتين دول، بس دي حاجة بتاعة ربنا لا هو لبس ولا إسورة، إنما لو بصيت كده على هيفاء وهبي وياسمين صبري، هتلاقي الاتنين عندهم نفس الحسنة في نفس المكان تقريبًا على الخد اليمين، بص كده الصورة
 |
| ياسمين صبري وهيفاء وهبي |
الحقيقة لما تشوف التشابهات دي بين ياسمين صبري وهيفاء وهبي، لازم ييجي في دماغك على طول الفنان عمرو عبد الجليل في فيلم صرخة نملة وهو بيقول فيكوا شنب من بعض 😂😂😂
ياسمين صبري تظهر بـ "فرصة تانية" في رمضان:
الفنانة ياسمين صبري هتقدم مسلسل "فرصة تانية" في رمضان 2020، وهو تاني مسلسل ليها كبطولة مطلقة بعد مسلسل "حكايتي" اللي اتعرض رمضان اللي فات، وحقق نجاح كبير وشارك فيه فنانين كتير زي أحمد صلاح حسني وأحمد حاتم وأحمد بدير ووفاء عامر، وكان من تأليف محمد عبد المعطي وإخراج أحمد سمي.أما بقى مسلسل "فرصة تانية"، هيشارك فيه برضو عدد كبير من النجوم والفنانين زي محمود البزاوي وإدوارد وأيتن عامر ونهال عنبر وهبة مجدي، وهيكون من إنتاج شركة سينرجي، من تأليف مصطفى جمال هاشم وإخراج مرقص عادل، وبيتكلم عن المهندسة ملك اللي هي هتبقى ياسمين صبري طبعًا، وإلا دائمًا بتفشل في علاقاتها العاطفية علشان بتحب شغلها، لحد ما هتقع في إيد حد من الشخصيات الطماعة اللي هيحاول يستغلها ويدمر حياتها.
برومو مسلسل فرصة تانية للفنانة ياسمين صبري ...
الحقيقة إن الفنانة ياسمين صبري أثبتت وجودها بتمثيلها وجمالها، وقدرت في فترة قصيرة إنها تكون من النجمات في عالم التمثيل بين كل النجمات الكبار اللي في الوسط، بعيدًا عن كلمة "أحيه" اللي بتهرينا بيها كل ما تطلع في برنامج !!.
تعليقات
إرسال تعليق